Re1ikt едуць у тур «па бабулек»

Мінскі гурт Re1ikt выпраўляецца ў другую частку канцэртнага тура па Беларусі ў межах кампаніі «Будзьма беларусамі!» Апроч выступаў, музыкі таксама плануюць сабраць фальклорны матэрыял для наступнага альбома, на базе якога гурт плануе скласці і запісаць новыя кампазіцыі.

Нагадаем, што ў скарбонцы калектыву ўжо ёсць уласныя версіі народных беларускіх песень «Ой, рана на Івана» і «Чаго ты, лося, чаго ты дзікі», якія каманда выконвае на канцэртах і фестывалях.

«Народныя песні мы адкрылі для сябе чатыры гады таму. Спярша пачалі слухаць „Троіцу“, і зацікавіліся фальклорам глыбей. Зрабілі сваю версію „Ой, рана на Івана“. Неяк зацягнула. Беларускія песні ў выкананні бабуль кранаюць мацней, чым любая музыка. Мы разумеем — гэта наша ўсё. У новым альбоме будзе некалькі народных песень з „рэліктавай“ аранжыроўкай. І калі ў нас атрымаецца самім сабраць гэтыя песні, будзе выдатна», — распавядае лідар гурта Аляксандр Дземідзенка.

У верасні і кастрычніку Re1ikt адыгралі канцэрты ў Светлагорску, Гомелі, Рэчыцы, Слуцку, Мар’інай Горцы і Барысаве. Цяпер гурт выступіць у Доме культуры гарадскога пасёлка Халопенічы (24 лістапада) і ў байкер-пабе «Кочевник» у Бабруйску (30 лістапада). Таксама каманда дасць некалькі канцэртаў у гарадах Беларусі ў снежні.