Праект Hurma прэзентаваў дэбютны сінгл «Шукай»

Праект Hurma нарадзіўся ў Мінску ў 2011 годзе пад іншай назвай і, акрамя ўдзелу ў некалькіх невялікіх фэстах, нічым пра сябе не заявіў. Увосень 2012-га лідар гурта Мікіта Найдзёнаў рэфармаваў «мёртванароджаны» праект у абсалютна іншы, з новай назвай і абноўленым складам. Да гітарыста-вакаліста (Мікіта) і барабаншчыка (Зміцер) далучыўся яшчэ адзін гітарыст (Кірыл). У лістападзе быў запісаны дэбютный сінгл «Шукай».

— Песня атрымалася халоднай і нардычнай, — расказвае Мікіта. — Чамусьці belaruski pop-rock мне бачыцца менавіта такім. Але гэта толькі пачатак. Што будзе далей, не магу сказаць дакладна.

Кампазіцыю запісвалі на новай студыі Orangrecords. Гукарэжысёрам выступіў Уладзімір Трафіменка.

— Перапісвалі «Шукай» 4 разы, таму яшчэ адно дзякуй нашаму цярпліваму гукарэжысёру. Проста не адразу знайшлі патрэбны гук — кідаліся то да хард-року, то да гаражнага року, пакуль у рукі мне не трапілася акустычная гітара, — адзначае Мікіта.

Дарэчы мастэрынг сінгла належыць вядомаму беларускаму гукарэжысёру Сяргею Чайка.

Акрамя інтэрнэт-сінгла ў маладога гурта пакуль толькі планы. Напрыклад, выступленне на традыцыйным фэсце «Такие пряники-2012» Белдзяржуніверсітэта. Таксама на снежань запланаваны выхад яшчэ аднаго сінгла.