Мінскі гурт Like a Gossamer выдаў альбом «Kliatva viernasci». Гэты CD — міжнародны арт-праект, які з’явіўся на стыку трох відаў мастацтва: сучаснай авангарднай музыкі, графікі і літаратуры.

— У альбоме слухач знаёміцца з маладым этнографам-фалькларыстам, які вандруе па Беларусі, гутарыць з людзьмі і запісвае іх апавяданні, — кажа лідэр Like a Gossamer Дзяніс Голін. — Гэта канцэптуальны музальбом, створаны паводле беларускіх легендаў і паданняў. Ён працягвае рамантычную традыцыю, закладзеную Янам Баршчэўскім у «Шляхціцы Завальні» і ўжо ў наш час развітую Уладзімірам Караткевічам.

У аснове літаратурнага складніка альбома ляжаць не толькі клапатліва сабраныя ў навуковых і мастацкіх крыніцах малавядомыя легенды Беларусі, паэтычная інтэрпрэтацыя якіх належыць пяру паэткі Алены Жукавай, але таксама і біяграфіі выбітных дзеячаў нашай гісторыі (Усяслава Чарадзея, Міхала Клеафаса Агінскага ды іншых), чые жыцці сталі прыкладам служэння роднай зямлі і натхнілі музыкаў.

Візуальным складнікам «Клятвы вернасці» з’яўляецца графічны цыкл, адмыслова створаны ў арыгінальнай тэхніцы манатыпіі мастачкай з Берліна Катарынай Філіст. Такім чынам буклет дыска Like a Gossamer ператварыўся ў паўнавартасны мастацка-паэтычны альбом на 24 старонкі.

Сам альбом уяўляе сабой музычны цыкл з 20 кампазіцый, у якім песні арганічна спалучаюцца з такой формай сучаснай электраакустычнай музыкі, як soundscape composition.

Тэхніка soundscape composition характарызуецца наяўнасцю ў музычным палатне пазнавальных гукаў навакольнага асяроддзя і кантэкстаў (русалка, якая жыве ў возеры Свіцязь, узрушаны натоўп на плошчы старажытнага Полацка боты жандараў, што грукаюць па віленскім бруку), якія будзяць уяўленне слухача і выклікаюць у яго ўспаміны ды асацыяцыі. Іх для альбома стварыў саўнддызайнер з Санкт-Пецярбурга Арцём Бусел.

Трэкі ахопліваюць шырокі спектр стыляў: андэрграундная эстэтыка аб’ядноўвае ў альбоме progressive metal, medieval, folk, класіку і джаз. Абрамленнем цыклу сталі беларускія народныя песні: зімовая «Ой, стаіць Бяроза» і восеньская «Зашумела дубровачка», выкананыя ў традыцыйнай манеры.

Арт-праект «Kliatva viernasci» увасобіўся ў рэчаіснасць дзякуючы ініцыятыве «Кірмаш праектаў», якая плённа рэалізуецца на Беларусі грамадскай культурніцкай кампаніяй «Будзьма беларусамі!»