Беларускія гурты Dzieciuki, Hair Peace Salon і The Toobes выступяць на буйным польскім фестывалі Cieszanów Rock, які адбудзецца з 22 па 28 жніўня ў горадзе Цешанув.
Cieszanów Rock — адзін з найбольш папулярных фестываляў Польшчы, які ў мінулым годзе быў уключаны ў ТОП-3 лепшых фэстаў па версіі часопісу Machina. Фестываль ладзіцца ў маленькім горадзе Цешанув у Падкарпацкім ваяводзтве, на мяжы Польшчы з Украінай. У мінулым годзе яго наведалі больш за 20 тысяч гледачоў, а хэдлайнерамі імпрэзы сталі The Exploited, T.Love, Farben Lehre, Lao Che і іншыя гурты.
Сёлета Cieszanów Rock адбудзецца ўжо ў чацьвёрты раз. Як і ў мінулым годзе ў фестывалі прыме ўдзел беларускі гурт The Toobes. Да іх у гэты раз далучацца гарадзенскі фольк-панк гурт Dzieciuki і мінскія інды-рокеры Hair Peace Salon. Сярод хэдлайнераў значацца вядомыя польскія гурты Riverside, Vader, Kult, Big Cyc, Dżem, Czesław Śpiewa, Madball і іншыя.