Мінскі фолк-панк гурт «Кашлаты Вох» прэзентаваў у інтэрнэце новы EP «Цуд-зуд», у які ўвайшлі чатыры трэкі ў абсалютна рознай стылістыцы.

— Задумка запісаць гэты міньён з’явілася разам з праблемамі ў складзе яшчэ ў лістападзе 2012 года, калі нам прыйшлося развітацца з бубначом Назарам Грабёнкіным (ён цяпер грае ў гурце Omut), — кажа вакаліст і дудар Васіль Саковіч. — Калі мы прывозілі ў Мінск Уладзіміра Снягурчанку з яго праектам «4 реактор» і зрабілі агульную праграму з ім, то адчулі, што нараджаецца нешта магічнае. Мы вырашылі запісаць новы міні-альбом у акустыцы, але потым перадумалі. Вырашылі зрабіць яго альбомам кавераў саміх на сябе.

Па словах музыкаў, новы EP — варыяцыі на тэму «што было б, калі б мы не ведалі, што робім». Запісваўся і зводзіўся «Цуд-зуд» на хатняй студыі высілкамі ўдзельнікаў гурта «Кашлаты Вох».

— Калі першы альбом быў гэткім зборнікам песень ад пачатку нашага шляху, то цяпер мы ўжо на 99 адсоткаў вызначыліся наконт зместу нашага другога студыйнага альбому, — распавядае другі вакаліст і дудар Вячка Красулін. — На міньёне можна пачуць і рэгі, і сінці-поп, і нешта кшталту «Bloodhound Gand сустракаюць Spiritual Front». А яшчэ тут ёсць сакрэтны трэк. Там мы вырашылі забіць свае комплексы.

Гурт «Кашлаты Вох» з’явіўся ў 2007 годзе і грае фолк-панк. У сакавіку 2013 году гурт прэзентаваў дэбютны паўнафарматны альбом «Пазаўчора» — вынік трохгадовай студыйнай працы.