Гурт Navi прэзентаваў дэбютны альбом

Мінскі дуэт Navi, які складаюць музыкі Ксенія Жук і Арцём Лук’яненка, прадставіў на сайце Еўрарадыё дэбютны альбом «Лови». «Мы хочам, каб людзі злавілі нашу хвалю. Лавіце нас, наш альбом, лавіце гэтыя эмоцыі!» — тлумачыць назву пласцінкі Арцём Лук’яненка.

У альбом увайшлі песні, якія былі напісаныя вясной, непасрэдна пасля стварэння дуэта. Сярод іх — тры сінглы гурта, выдадзеныя раней. Праўда, музыкі прапануюць паслухаць сёння толькі 8 трэкаў. Астатнія 2 пакідаюць у якасці сюрпрызу да канцэртнай прэзентацыі.

— Гэтыя 10 песень для нас — вялікая гісторыя, — працягвае Арцём Лук’яненка. — То бок, нічога лішняга — ніякіх «левых песень», ці пазней прыдуманых — усё напісана ў адным ключы. Мы вельмі стараліся нешта новае прыўнесці. І некаторыя песні будуць нават дзіўныя па гучанні. Яны нібыта ўсе і падобныя, але ўсе розныя. Як розныя адценні аднаго настрою. Ёсць песні проста пад фано, а ёсць такі драйв-драйв. Людзі зразумеюць, што мы можам не толькі «мурлыкаць саплівыя песні», а яшчэ і паказаць вясёлую частку сябе.

Адразу пасля прэзентацыі «Лови» Navi сядаюць у студыю для працы над новай пласцінкай. Арцём упэўнены, што «спыняцца нельга» і абяцае, што наступны рэліз Navi будзе запісаны ў пашыраным складзе.

Прэзентацыя альбома «Лови» пройдзе 23 лютага ў кавярні Loft.

---

Спампаваць Navi «Лови»