bandscan:Belarus: вынікі другога чвэрцьфіналу

Змаганьне за паездку ў Швэцыю працягваецца. Гурты The Toobes, «Детидетей» і Bez.not сталі пераможцамі другога чвэрцьфіналу беларуска-швэдзкага конкурсу bandscan:Belarus. Як паведаміў менскі каардынатар конкурсу Аляксандар Багданаў плянуецца, што праз паўгоду bandscan пройдзе ў Швэцыі і ўжо тамтэйшыя каманды будуць змагацца за паездку ў Беларусь.

Другі чвэрцьфінал конкурсу bandscan:Belarus прайшоў 16 лістапада. Аргкамітэт конкурсу падвёў вынікі глядацкага галасаваньня. Тры каманды, што набралі найбольш галасоў трапілі ў наступны этап конкурсу:

1. The Toobes — 139
2. «Детидетей» — 122
3. Bez.not — 120
4. Morfe Acoustic Band — 72
5. «Джамбібум» — 65
6. hum flying bulletproof noodle — 59

Такім чынам, у паўфінале конкурсу, што адбудзецца 7-га сьнежня ў клюбе fabrique выступяць: «Серебряная свадьба», Open Space, Hair Peace Salon, Bez.not, «Детидетей» і The Toobes.

Сталі вядомыя і вынікі чвэрцьфіналу конкурсу, што праводзіўся ў Віцебску. Тамака перамаглі гурты Minas Morgul, «Уже» і South Band. У паўфінале яны зайграюць разам зь пераможцамі першага чвэрцьфіналу — гуртамі LaBo, «Скімэн» і Jenowa.

У фінал праходзіць 6 камандаў — па дзьве з кожнага гораду (конкурс яшчэ ладзіцца ў Баранавічах). Усе фіналісты маюць атрымаць у якасьці прызу «часткі апарату», як кажуць арганізатары, а пераможца паедзе ў клюбны тур па Швэцыі.